Es Lääwe kann jo als emol kitschischer soi als die Groscheroman, womer als Kinner heimlisch gelese henn. So bleed des klingt, was isch do schreib - es is alles wohr!

De Steve un soi Pälzer Verwandtschaft
En Vorort vun Bethlehem.
E Träning fer Menschreschtsbeowwachter in de Paleschdinensergebiede. Leit vun iwwerall her, drunner vier Amis vun "Jews for Justice" un "Jews against the Occupation". Die finnen des nämlisch aa net gut, was ehr Glauwensbrieder mit de Paleschdinenser machen.
Zwischdursch gebts emol ebbes zu esse, isch hock bei dene Amis, un de äänt  froocht misch “Which part of Germany are you from?” Was saacht mern do, uff die Dischdanz! Alla, isch hab halt gsaacht: “I’m from the Palatine," un gemäänt, isch mißt erscht erkläre, "few people know the area. It’s left of the River Rhine”. Un mitteme Grinse hawwisch dezugsetzt: “Westbank of the Rhine, which has frequently been under occupation”. Schließlisch waamer jo in de Westbank vum Jordan, un ach inneme besetztde Gebiet. "Palestine" un "Palatine" klingt sogar noch ähnlisch...
Isch waa dann ziemlisch baff wie er gsaacht hott, er hett Verwandde in de Palz. Die hotter awwer schun zwanzisch Joor nimmi gsehe, und Deitsch kanner ach net.
Vun wo in de Palz?
Es gebt jo nix, wasses net gebt!
Zwar hotter nimmi gewißt, wie der Ort hääßt, awwer er hot de Name vun seine Verwandte gsaacht, un der is mer bekannt vorkumme.- aus Lambrecht! Soin Unggel war emol Borjemääschder in Eschdel.
Na, do wars klar, wassisch sofort mach, wann isch widder dehääm bin!
Awwer erscht emol hemmer gemacht wofier me dort waarn. E ganz klää bissel fer Gereschdischkeit zu sorsche un die Zivilbevelgerung in de besetzde Gebiet zu schitze versuche, soweit des iwwerhaupt meeglisch is. Ach, des is jo wie wammer middeme Kaffeeleffel es Middelmeer droggelesche wollt!. Do bassieren jo Sache, die deet mer net glaawe, wammer se net selwer erlebt hett. Awwer so schlimm des an sisch is: noch viel schlimmer is, dasses nimmand heere will bei uns! (Wanns jemand doch intressiert - äfach e Email schigge, isch verzehl do gerne meh driwwer!!).
Wie isch widder dehääm war, hawwisch ziemlisch viel rumtelefoniert, mit Leit von Lambrescht nadierlisch, e paa Emails gschriwwe, un schließlisch war die Familljezammefiehrung perfekt. Sie henn sisch widder gfunne un enanner gschriwwe.
De Steve hawwisch inzwische aus de Aache verlore. Er war sischer noch efders in dem Gebiet, des fer Jude, Chrischde un Moslems “heilisches Land” is, un misch hen die, wo dort es Saache hen, irschendwann nimmi ins Land geloßt, awwer des weer widder e Gschischt fer sisch.
Vielleischt hemmer uns äfach bloß des ääne Mol treffe misse, des äne Mol, wos gebraucht hot, dasser widder de Weesch zu seinre Pälzer Sippschaft in Lambrecht findt. Es Schiggsal loßt sisch jo als emol allerhand oifalle.

Hetzelstift
Isch war noch e paarmol in de Westbank un ach im Gazastreife. Un dodebei hawwisch noch so e uuverhoffdi Begeschnung ghatt.
Im selwe Zammehang.
Widder beim Esse, wo mer gescheseidisch froocht "Wo kummschden du her?" Esse un Dringge halt jo bekanntlisch Leib un Seel zamme, un de Mensch lääbt net vum Brot allää.
Desmal war die Iwwerraschung e Eschdreischerin, isch wääß gaanimmi wie se ghääße hot. Kranggeschwester. Wie se gheert hot, daß isch aus de Palz kumm, hot se daadsäschlisch verzehlt, daß se emol in Neischdadt gschafft hot. Im Hetzelstift! Ja, dort hawwisch jo ach emol gschafft, mit 16, in de Ferie...awwer des is e anneri Gschischt.

Es geebt noch ganz, ganz viel zu verzehle ausem Wilde Oschde! Isch war gern dort, fascht e bissel dehääm. Awwer irschendwann henn misch die annere, wo drumrumhoggen un alle Grenze im Griff henn, nimmi noigeloßt. Dodebei hawwisch gaanix aagschdellt un ach immer moi Reschnunge bezahlt. Wasne net gebaßt hot, war wahrscheints des, daß isch halt in de Feldposcht vun dort gschildert hab, was in de besetzde Gebiede los is, un daß isch moi Määnung gsaacht hab. Als ob in meine Emails jemand rumzufummle hett!
Des Wort "Fluchhafe" hot jo dort ganz eischeni Bedeidung: mer werd so oft gfilzt un ausgfroocht, daß mer wirklisch fluche kennt! Des hab isch nadierlisch uff pälzisch gemacht, zum Dampfablosse, awwer verschdehe solldenses halt doch net. Wer wääß, vielleischt hennses jo doch verschdanne, weil de äänt oder anner e Oma ghatt hot, wo Jiddisch gered hot - un des kling bekanntlisch so ähnlisch.