“Mohrekepp” gebts scheints gar nimmi. Gewwe duut ses jo vielleischt noch, awwer dann hääßen se annerscht. “Schaumsüßigkeit mit Schokoladenüberzug” odder ähnlisch dabbisch. Wääß de Deiwel, wer uff die Idee kumme is, Mohrekepp kennden ebbes Rassisdisches sei! Mer henn doch all gern Mohrekepp gesse, un do hot sisch doch ganz beschdimmt nimmand ebbes Beeses debei gedenkt! Isch hoff, daß mer jetzt nimmand de Frack verkloppt, weil isch vielleischt e paa Werder brauch, wo mer eischentlisch nimmi saache derf.
In der fuffzischer un aanfangs seschzischer Johr war fer Määdle domools de Hit uff de Wunschzeddel zu Weihnachde odder zum Geburtsdaach e “Nääscherbopp”. Des war durschaus polidisch korrekt! Die Bobbe warn e bissel dunkler, hen schwarzi Hoor ghatt und warn mindeschdens genauso begehrt wie bei unsere Kinner die Barbie-Bobbe. Allerdings henn se viel gsinder ausgesehe.
Määdle, wo langi Hoor ghatt henn, henn sisch ach gern en  “Nääscherzopp” gemacht, des war en Zopp, wo net hinnenunner ghangge is, sondern uff die Seit gflochde war. Hot schää ausgsehe!
Isch kann misch ach noch gut erinnere, wie emol so en - wie hääßt des eischentlisch heit, wammer nimmand uff de Schlips trede will? - also so en Mann mit dunkler Haut in Lambrecht war un an verschiedene Deere geklingelt hot. Wasser wollt, wääßisch net. Vielleischt hotter fer ebbes gsammelt, vielleischt hotter jemand gsucht. Jemand hot gsaacht, es weer en Student aus Heidelbersch. Fer uns Kinner war er hochindressant, der Besuch vun weit her, wo so annerscht ausgsehe hott! Mir sinn jedenfalls begeischdert hinnerm hergerennt, un jeder wollt em emol die Hand gewwe. Wer wääß, vielleischt hemmer gedenkt, die Faab geht ab. Der fremde Mann hot bloß gelacht un uns mache losse. Ja, die Hand hotter uns ach hiegschdreckt. Wann sisch jemand dann wirklisch getraut hot, em die Hand zu gewwe, hemmer all gejohlt, des war e tolli Sach fer uns!
Do hawwisch speeder widder draa gedenkt, wann isch mit indernationale Friedensakdivischde in de paleschdinensische Flischtlingscamps unnerwegs war. Do warn mir die Fremde, do sinn die Kinner uns hinnerhergerennt - un wollden uns die Hand gewwe. Die äände henn sisch getraut, die annere sinn dann kischernd doch widder ab, wammer ne die Hand gewwe wollt. Genau wie mir domols in Lambrecht.
Un ach in Uganda - wann isch do dursch des Dorf geloffe bin, wo isch fer e Selbschthilfeprojekt Wutzeställ gebaut hab, warens die Kinner, wo immer gewunke un gerufe henn “Hi, Mzungu!” (Uff pälzisch so uugfähr: “Huu-uu, Weißi!” Mein Arm war als emol ganz lahm vum viele Zurickwinke, un die Antwort “Hi, Mudagawu!” (“Huu-uu, Schwarzer!”) war ganz normal. Isch hab halt e helleri Haut, un die Leit dort e dunkleri, des is halt so. De Unnerschied machts dann erscht, wann de Äänt ebbes Besseres sei will wie de Anner. Des is bei Kinner noch net so. Kinner sin doch immer neigierisch, egal wo uff dere Welt. Fer Kinner is Neies indressant, ach wanns manschmol e bissel Angscht macht. Kinner froochen un wollen meh wisse, anschdatt alles glei besser zu wisse. Vorausgsetzt nadierlisch, mer loßt ne die Neigier, loßt se frooche und gebt ne Antworde. Wer Friede will, soll bei de Kinner aafange!
Weidermache kammer dann bei de junge Leit.
Wie isch noch klää war, hots Ferielaacher gewwe wo jungi Leit aus Frankreisch un Deitschland minanner die Soldaadefriedheef gepfleescht hen. Uff die Art hennse net bloß gescheseitisch die Sprooch gelernt, sondern wahrscheinlisch ach gheert, wies de jeweils annere Seit gange is, un mit dem Verständnis vun enanner hot mer halt kä Basis mehr fer Feindbilder.
Noch besser is awwer, daß jungi Leit sich net vun de Alde vorschreiwe lossen, in wen se sisch verliewe duun.
Die Generation vor uns, die henn jo die Amis net so toll gfunne, un wann e Määdel mit eme Ami oder Franzos gange is, hot mer geduschelt. Isch wääß nimmi, wer des war, wo in Lambrecht so e goldisches schoklaadfarwisches Kind kriet hot, un e Weil druff hot ehr Schwesder ach so e goldisches schoklaadfarwisches Kind kriet...so viel war klar: der Vadder vun denn Kinner war kän Lambrechter! Was ausem  worre is, un vor allem, was aus de Kinner worrre is, wääß isch net. Leischt henn ses wahrscheints net ghatt. Es gebt halt noch viel zuviel Leit, wo des Indresse am Uugewohnde verlore henn, wo se als Kinner noch ghatt henn. Stattdesse henn se jetzt Angscht un schaffen sisch mit Schleschtmache un Ausgrenze genau den Zores, vor dem se sisch ferschden.
Wermer eischendlisch nie gscheit?