Die alt Lohrn

Noch viele Johre hawwisch emol moin Kuseng ausem Dunnersberschkreis widdergetroffe. Wie mer so Verzehlsches gehalde henn, hodder unner annerem gfroocht, was isch beruflisch so mach. Wie er dann ebbes gheert hot vun "Psychotherapie" un "Eheberodung" (sinn jo iwwerhaupt kä Pälzer Werder!) hodder gegrinst:
"Waasche, unser Großmudder hot jo so ebbes Ähnlisches gemacht - awwer wahrscheints e bißje annerscht als du!"
Er hot des dann erklärt:
"Wann doo im Dorf zwää Krach ghatt hunn, is die alt Lohrn hie un hot se so lang zusammegeschiß  un so lang mitne gescholde, bis se sisch widder vertraa hun! Des hot aa meischdens aagehall."
Schdimmt, isch mach des schun e bissel annerscht.  Die Leit zammeschdauche, bis se sisch widder verdraachen - es kännt mer heit jo sowieso nimmi bringe! Nää, nää, isch mach des nadierlisch e bissel viel annerscht!
Awwer manschmol...selde, awwer monschmol halt doch...do hawwischs mit Leit zu due, wo mer uuwillkierlisch moi Pälzer Großmudder ausem Dunnersberschkreis oifallt. Leit wo sisch ums Verregge uubedingt in e Kadaschdroof schderze odder Mischt baue wollen un sisch mit nix, awwer gaanix devu abhalde losse wollen. Dann deet ischs halt am liebschde ach so mache wie die alt Lohrn ...