Wer en TomTom-Navi hot, kann sisch jetzt ach vun mir rumschicke losse, uff Pälzisch nadierlisch.

Die Stimm hääßt "Palatina", mer kann se vun de TomTom-Webseit runnerlade - sogar fer umme :-)!

Worzle

Grad emol siebzeh waa isch.
Im Zuuch zwische Lambrecht un Neistadt. De Schaffner, en freundlische Tüpp, zwickt moi Faahrkaat, sieht “Lambrecht” un froocht: “Sinn Sie vun Lambrecht?”
“Nää, nää," saach isch, stolz wie en Spanier, “des waa emol. Isch hab blooß moi Eldre besucht. Isch wohn jetzt in Heidelbersch!” Isch wääß nimmi, um wieviel isch bei denne Wort gewachse bin.
Wodruff er määnt, “Amme schääne Daach denggense noch emol gern an Lambrecht zurick!”
Isch hab mer des gaanet vorstelle kenne.
Lambrecht - isch hab doch net schnell genuuch fortkumme kenne vun dort! Hab sogaa noch e Johr frieher Abidur gemacht, bloß um endlisch in die Welt naus zu kumme!

An den Schaffner hawwisch inzwische schun efder gedenkt.
Was noch alles kummt un wo’s misch noch immerall hii verschlaacht, des hawwisch mer mit siebzeh net vorstelle kenne. Ja, isch bin viel in de Weltgschischt rumkumme un hab ach e Handvoll Sprooche gelernt. (Vun dem, was isch alles schun widder ver-lernt hab, reddemer mol liewer net!)
Irschendwie hot der Schaffner domols jo rescht ghatt.
Awwer es hott halt e Weil gedauert, bis isch des so rischdisch gfresse hab. Es gebt Sache, die missen halt wachse. Awwer sie kennen net wachse ohne Worzle. Un moi Worzle sinn in de Palz - drum werd uff dere Seit do Pälzisch gebabbelt!